呢篇文主要係介紹Nottingham嘅電車，關於當日我去過嘅其他地方會係下一篇文不日推出。
 |
| 攝於 Old Market Square 站，電車同隔離嘅廣場融為一體 |
 |
| 路線圖 暫時只係北面嘅線先開始營業 南面嘅電車路最快 2015年起好: http://thetram.net/pdfs/Tram%20network%20all%20routes.pdf |
Nottingham 嘅電車又名為 Nottingham Express Transit，現時有一條線由 Station Street (火車站）至Hucknall 及Phoenix Park. 全長14公里共有23個站，當中市中心有4公里嘅電車軌係喺街上嘅，係市郊有專用嘅電車軌。電車系統於2004年3月開始營運，開業時係英國唯一全低地台電車系統，開2005年電車超越規劃時嘅預期，載客九百七十萬，對上13／14年度就載客七百九十萬。
用車
Nottingham 嘅電車係有15列 Incentro AT6/5 電車，該電車喺全低地台設計，地台高度比超低地台巴士仲低。電車有「五卡」但係唔係每卡都有車轆。當中淨係得一三五卡先係有轆第二四卡係就咁掛喺其他車卡中間所以電車係唔好以分開營運嘅，一定要一列咁行，正確嚟講係有5個掛接組件。
 |
| 清晰可見第二 四卡係冇轆嘅 |
電車全長33米，有54／58個座位，129個企位，總載客量183／187人，同一節輕鐵差唔多。電車由最遠嘅Hucknall至市中心唔多於30分鐘設置上亦都有唔少企位門位。電車有五道門頭尾卡有一道單門喺駕駛艙側邊，冇車輪組件嘅2，4卡就有兩道雙門。多門嘅設計令電車喺市區大上大落亦都好快，唔使用好多時間停站。頭尾卡以座位為主，基本上座位係係車輪上面，由於超低地台所以車轆無可避免係要凸出係車廂，用嚟做位可以善用空間。頭尾卡各有16個位，當中有兩pair面對面嘅位，中間三卡冇乜點坐唔太記得，第三卡記得座位係2+1嘅唔知係咪因為動力組件嘅關係令到唔好以每邊兩個位。
 |
| 因為唔想影到人，車內嘅相係得一千零一張。攝於第五卡向前 |
坐咗幾轉覺得電車幾好坐，主要都係坐1，5卡嘅面對面坐，行車穩定性亦都好好。有一程車無位坐企喺車尾亦都唔覺得架車拋。
受惠於五節嘅結構，每節電車只係六七米，轉彎嘅半徑好細所以係市中心嘅窄街穿梭毫無難度。
 |
| 攝於 Old market Square 同 Lace Market 站之間嘅一個急彎 |
 |
| 轉彎時可以清楚見到車頭 |
電車同香港嘅電車好唔同，雖然係市中心係行得好慢，但係出到市郊專用嘅路段可以行到最高時速80km/h。電車係Bulwell同Hucknall之間同火車並行，親眼見過50－60行緊電車係個站起步一路爆到80，到下一個站之前追到架火車。
 |
印上自家宣傳廣告嘅電車
宣傳2014年付運嘅新車同更頻密嘅班次 |
為咗2015年新線嘅開張，電車公司order咗22列 AlstomCitadis 302 電車，喺 27／7／2014開始測試營運。可惜我唔開彩答唔中新電車，夜晚見到一次，但係又拎唔切相機。新車嘅車頭比舊款更加流線型。舊款車轆嘅凹型車架組件亦都唔見，相信車轆喺直接收起係車身入面。其餘嘅特徵好似車門等等望落冇乜唔同。
 |
| 借用電車官網相 |
http://thetram.net/news/1/Last-of-new-trams-arrives-in-Nottingham/
路線 車站
Nottingham 電車現時有一條線，2，3號線依然興建中。一共有23個車站，由Nottingham火車站開始向北行全長14公里。當中The Forest站同Wilkinson Street站中間南北行嘅電車喺分開兩條街行嘅而且喺錯位行，向北嘅電車係行地圖上右手邊嘅街以向左嘅電車係行左手邊嘅街，所以電車路南北行係有 overlap，要踩過對面條線先過到去。去到 Daivid Lane 站電車分開兩條線，一半嘅班次係去 Phoenix Park 嘅支線一半嘅車就去較遠嘅Hucknall總站。 |
| 攝於The Forest站向北，清晰可見兩架電車嘅走線overlap 靠近鏡頭嘅電車係向鏡頭方向 |
盡量由 Station Street 火車站開始逐個站啲相出嚟（有嘅話）
Station Street
 |
唔記得影相，係火車月台臨走先記得影番......
|
位於Nottingham火車站，係暫時嘅總站。喺第二期工程完結嘅時候會變返中途站，都是南北方向都可以有電車。由於配合第二期工程要向南伸延，跨過火車軌，本站設喺高架橋上。有左右兩邊兩個月台，而家距離出入口遠啲個個月台嘅電車係去 Phoenix Park 而近啲個個嘅電車係去 Hucknall。此外電車嘅月台同火車站俾乘客用嚟落月台果條橋係互動嘅，由於係英國搭火車基本上唔使出入閘，所以一行出電子站就可以轉火車，有火車飛嘅話連車站大堂都唔使入，非常方便。
 |
| 借用google street view 希望睇得明啲，中間遠啲個條係火車站條橋 |
Old Market Square
出火車站第二個站，位於 Old Market Square 隔離，Old Market Square 係市中心一個大廣場，到訪當日係有一個Christmas Market，當中一邊嘅車站直接起喺廣場度，電車嘅地台好低所以月台同行人路係差唔多高，無站牌同售票機嘅話應該無人知係車站。
 |
| Old Market Square 隔離 |
The Forest
喺北行入分叉路之前嘅最後一個站，起喺一個斜坡都（向北係落斜）有一個島式月台（北行）同一個側式月台。另外呢個站仲有Park and Ride嘅停車場係站嘅東面。Park and Ride係俾人渣車去到就近嘅電車站，泊低架車再搭電車入市區，減少進入市區嘅私家車。除咗The Forest 之外兩個北面嘅總站，Wilkinson Street 同 Moor Bridge都有同樣嘅停車場。
 |
留意右邊幾架車個度就係停車場
|
 |
| 攝於 The Forest 向南 |
David Lane
去 Phoenix Park 同 Hucknall 電車共同停泊嘅最後一個站，下一個站 Highbury Vale 雖然個名一樣，亦都好近但係兩線已經分開咗，停唔通月台。除此之外算係好標準嘅一個站，我係去完 Phoenix Park 之後去呢度轉車去 Hucknall。
Phoenix Park
Highbury Vale 站開始轉向西行嘅支線就去到呢個總站。值得一提嘅係 Highbury Vale 至 Phoenix Park 一段喺單軌，之間嘅 Cinderhill 站亦都只得一邊月台，即使 Phoenix Park 有兩個月台但係電車都係即嚟即開，無話係開前一班停係總站嘅電車。呢度應該相當limit咗個班次但係顧及要將兩邊支線嘅班次合埋落市區嘅路段，應該唔成問題。
 |
| Phoenix Park 嘅 Park and Ride 停車場 |
Bulwell
喺 Highbury Vale後一個站，位於Bulwell 鎮市中心，而且喺Bulwell 火車站隔離，兩者同站但係相信冇乜人係果度轉車。同Phoenix Park 支線一樣，Hucknall線過咗呢個站一樣會變成單軌。唔同嘅係之後每個站都有兩個月台作避對頭車之用。
車站有一個島式月台，乘客落車後一定要橫過電車軌
 |
| 左邊得一個月台嘅係火車站，相信班次好疏 |
 |
| Bulwell |
Hucknall
電車系統最北端嘅總站，有兩邊月台，靠近 Hucknall 火車站，亦有 Park and RIde 停車場。
另外中間仲有好多個站，但係實在係冇時間逐個落車睇。
營運 乘車資訊
電車全日日間與市區路段 5 分鐘一班，過咗David Land由於分拆做兩線所以每邊 10 分鐘一班，係市區唔使等車咁滯。答左一日朝早同下午載客都唔多，大概座八成再有事企十個人左右。朝早入市區同黃昏出市郊就頗多人，坐滿再企一半位左右。但係由於去果日係禮拜六，平日返放工繁忙時間嘅客量都係未知。過咗夜晚九點班次會減到市區 7 分鐘一班，支線 15 分鐘一班。
車票方面，作為遊客我係站機買咗一日票，盛惠 3.70 鎊，個人認為係可以接受嘅。即場買單程票要 2.20 一程。另外當地人用儲值卡只係 1.00 一程 1.50一日，抵好多。仲有夾埋巴士火車嘅一日票，同月票 年票等。
結論
電車系統同香港嘅最好比較對象唔係香港電車而係輕鐵，香港電車由於歷史嘅因素本身就係慢過其他嘅交通工具。輕鐵嘅載客量，模式都同而家嘅現代化電車好似，同樣喺 open platorm 。不過一比較就發現現代化電車比輕鐵好好多倍，首先低地台嘅設計就算冇月台都可以上落，月台嘅高度連一級樓梯都無。除咗可以慳番起月台嘅位之外，咁嘅設計亦都方便乘客上落，以 Old Market Square 為例，乘客由落車到廣場所需時間係零。電車轉彎嘅半徑亦都俾輕鐵細，唔駛甘多位係，最高速度亦較高。事實上係市郊專用路段嘅感覺係似坐緊火車多過似坐緊電車。
電車可以即時落到街係一個成日俾人忽略嘅好大嘅優點，尤其係喺較短嘅車程入面搭地鐵嘅大部份時間係由地面行去月台再由月台行返上地面。如果啟德最終唔係起得個貴字嘅單軌電車以採用同樣嘅電車系統，對乘客嘅吸引力應該大增，至少慳返5分鐘上落時間。希望香港政府可以跟上潮流，採用係歐洲極度普遍，有各種優點嘅嘅電車。
No comments:
Post a Comment